فقط في المغرب .. التجارة بالعالقين

#بخصوص_التحاليل_اللي_شرطتها_الحكومة# خاص الحكومة تعرف آش كدير : 1 – كيفاش ندير التحاليل وخاصني يومين باش نوصل لمكان المركوب؟ غادي يفوت التارخ ديالهم يعني ضاعو لي؟ 2 – التحاليل خاصها أكثر من يومين باش تخرج هذا إلى ما طلبوش لك الموعد يعني يومين ما كافياش . 3 – السبت و الأحد ما كاين خدمة باش ندير التحاليل و هذا كيعني بأنه ما كاين مركوب الاثنين و الثلاثاء بسبب عطلة الأسبوع وهذا كيعني كذلك 4 أيام بلا مركوب الطائرات غادي توقف . ويصبح الضغط على 3 أيام فقط من الأسبوع اللي هي الأربعاء و الخميس و الجمعة فقط ، و تغلى أثمنة التذاكر على حسب الطلب وهي ياد غالية بسبب الحل العبقري الآخر اللي درتو بحيث شرطتو غير الخطوط الملكية و العربية اللي دارت أثمنة صاروخية باش تزيدو طحنو الناس بسبب عدم وجود منافسة !!! 4 – التحاليل غالية أبنادم وااااااا بنادم و خصوصا على العالقين !!! واش كتفكرو ولا غير كتهضرو ؟ واش ما سمعتوش العالقين كيبكيو عايشين في العذاب ما لاقيين ما ياكلو ولا ما يشربو و ناعسين في الزناقي بحال المتشردين و يتوسلو لصاحب الجلالة 4 شهور وتزيد عليهم التحاليل اللي فيها مشكل و التذكرة اللي فيها مشكل آخر أكبر ! واش بغيتو الناس تنتاحر ؟ ما حاسينش بأنهم عندهم مشاكل أخرى من غير العذاب اللي عاشوه ؟ راه كاين اللي خرجتو ليه على خدمتو و اللي تجمع عليه الكراء و اللي مخلي اولادو و عائلتو بلا مصروف و اللي مخلي المريض و اللي مخلية اولادها عند الجيران و اللي ماتو ليهم أعز الناس بلا ما يشوفوهم و ما ودعومش ؟ واش أنتما معانا ولا في شي عالم آخر ولا هادشي مقصود ؟ بغينا غير مرة واحدة فكرة مفيدة ! راه اللي مكلف بملف العالقين فشل ، فشل كبير ما يديرو حتى المبتدىء خاصو يتحاسب عليه ويعوض العالقين على الأضرار النفسية و المادية و هو باقي زايد فيه ، من فشل إلى فشل .فاش يحل مشكل كيزيد عشرة .اللي ما يقدرش على المسؤولية يعطينا التيساع كيف ما قال جلالة الملك راه البلاد فيها نساءها و رجالها.